Serie Focus 21: “The Human Scale” – 15. März 19h00

Image

An der Serie „Focus 21“ weise mer de Film „The Human Scale“. Zenter e puer Joerzéngten stellt den Architekt an Urbanist Jan Gehl d’Liewen vun de Mënschen an de Groussstied an de Mëttelpunkt vu senger visionärer Aarbecht. Dobäi geet et dem Architekt drëms neit Liewen an d’Innenstied ze bréngen. D’Relatioun zweschen gebauter Ëmwelt an der Liewensqualitéit vun de Bewunner ass fir de Jan Gehl a seng Kollegen zentral. Et geet och drem, dass d’Stied net um Autosverkéier erstécken, mee dass och Plaz fir Foussgänger a Vëlosfuerer geschaaf gëtt. Dobäi ginn prominent Beispiller aus Europa, Neuseeland, USA a China gewisen. Et ass eng Dokumentatioun, déi weist wéi een d’Verstädterung, déi eng Tatsaach ass, trotzdeem mat Architektur kann positiv gestalten.

15. März 19h00 – Centre Prince Henri, Walferdange
De Film gëtt an der englescher Originalversioun gewisen mat däitschen Ënnertitelen. Nom Film kann bei engem Patt diskutéiert gin.

Walfer Gemengerot vum Dezember: D’Oppositioun analyséiert d’Schäfferotserklärung!

Image

Um Programm vum Walfer Gemengerot stoungen 8 Punkten, dorënner de « plat de résistance », d‘Diskussiounen iwwer d’Schäfferotserklärung. No e puer Upassungen vum Reglement iwwert d’Kommissiounen, déi vun der Oppositioun monéiert goufen, ass dëst Reglement eestëmmeg ugeholl ginn, genau wéi de congé politique vun de Majoritéitspolitiker an de Syndikater. Oppositioun a Majoritéit ware sech och eens bei 2 Verträg, bei engem Subsid a bei engem Verkéiersreglement zum Chantier „Tunnel Rue Prince Henri“.
Bei der Schäfferotserklärung sinn et awer kloer Meenungsverschiddenheet ginn. Nodeems an der leschter Sëtzung d’Majoritéit hir Schäfferotserklärung als grousse Worf duergestallt huet, war et elo un der Oppositioun fir hir Roll ze spillen an d’Absichtserklärung vum Schäfferot fir déi nächst 5 Joer ze hannerfroen.
D’Oppositioun vun DP an LSAP huet kloergestallt, dass ronn 1/3 vun den Ukënnegungen vun der neier Majoritéit (CSV an Déi Gréng) schonn ënner dem alen Schäfferot realiséiert gi sinn. En anert Drëttel sinn entweder an den Attributiounen vum Staat oder legal virgeschriwwen, also och keng Eegeninitiativ vum neien Schäfferot. Schliisslech ass sech vun der Oppositioun dru gestéiert ginn, dass et keen Kapitel iwwert d’Schoul an der Schäfferotserklärung gëtt an e.a. och keng „maison de soins“ virgesinn ass. Am Sozialen ginn et keng nei Akzenter an och d’Thema Inclusioun gëtt net genannt. Am Nohaltegkeetsberäich ass de Sujet Subventiounen fir ëmweltfrëndlech Techniken a Privathaushalter vun der neier Majoritéit och ewechgelooss ginn.
Laut der DP/LSAP Oppositioun stinn Schäfferotserklärung a Budget haaptsächlech ënnert dem Motto „verwalten“ an e puer nei Etiketten drop setzen. Zum Budget sief och nach gesot, dass déi nei Koalitioun e groussen Programm versprach huet fir Bauterraine zum Marchéspräiss duerch d’Gemeng opzekafen, am Budget den Posten awer reduzéiert huet! Och fir de Reamenagement vun der Rue du Dix Octobre schéingt der Oppositioun d’Zomm, déi am Budget steet, ze niddreg, fir dass d’Aarbechten domat elo direkt kéinte ugoen. Grad an dëse Strooss mat villen Waasserfuitten wär et awer wichteg direkt eppes ze ënnerhuelen. D’DP/LSAP Oppositioun stemmt dann och konsequenterweis géint de Budget 2018.